Dala ang handom nga mahatagan sang dako nga kalipay kag igtulupangod ang mga Persons with Disability (PWDs) sa syudad, personal nga gindul-ongan ni City Mayor Angelo “Roncal” Montilla sang mga wheelchairs kag food packs ang pipila sa pili nga mga PWDs sa ila tagsa-tagsa nga panimalay sa anom ka barangay sang Tacurong.

Dose (12) nga mga PWDS, kung sa diin napulo (10) ang senior citizens kag duha (2) nga Children with Special Needs, ang nakabaton kag nakabenepisyo sang mga regalo ni Mayor sang Nobyembre 27, 2020. Residente ang mga ini sang barangay sang New Isabela, Upper Katungal, Lancheta, Baras, Rajah Muda kag New Passi.

Isa sa mga nahatagan si Larry Baulite, kwarenta’y dos (42) anyos nga PWD sang Barangay Upper Katungal. May Chronic Kidney Disease siya kag tungod sa kataason sang iya Uric Acid, ang iya mga kamot kag tiil naghurubag kag nagkarapilas na.

Sa ila pag-istorya ni Mayor Roncal, nagahiribion nga nagpasalamat si Larry kag ang iya misis sa dako nga butang nga ila nabaton tungod sa wala gid nakaagi dialysis treatment halin sang nag-umpisa ang iya sakit sang tuig 2016. Ini nga detalye gintagaan gid sang igtulupangod ni Mayor kag siya nagtanyag sang bulig halin sa kaugalingon niya nga bulsa samtang ginahulat nga matapos ang People’s Dialysis Center nga ginapatindog sang local nga gobyerno.

Kaupod ni Mayor Roncal sa pagpanagtag sanday Vice Mayor Lino Montilla, City Councilors Lalaine Montilla kag Atty. Remo Flores, mga empleyado sang City Government sang Tacurong kag City Social Welfare and Development Office (CSWDO). Kapuod man si City First Lady Cora Montilla nga nagahatag gid sang labi nga atensyon kag nagapanguna sa pagpatuman sang mga proyekto para sa mga PWDs sa syudad.

Ang pagpili sa mga benepisyaryo ang gintugyan sa CSWDO tungod sila ang nakahibalo sang mga nagapanginahanglanon gid nga PWDs.Katuyuan sang Lokal nga Gobyerno sang Tacurong nga ang mga PWDS, labi na gid ang mga Children with Special Needs, ang makaguwa sa ila panimalay para makita kag mangin parte sang komunidad.

Sa pangkabug-usan, may ara singkwenta (50) nga mga wheelchairs kag food packs ang natalana nga mapanagtag sa bente (20) ka mga barangay sang Tacurong. Ang dose nga mga regalo nga nauna na mapanagtag ang masundan pa subong nga Disyembre sang trenta’y otso (38) pa ka mga wheelchairs kag food packs.

Ang pagpanagtag nga ini sang LGU-Tacurong ang isa lang sa mga madamo pa nga mga nakaplano nga programa kag proyekto ni City Mayor Roncal kag City First Lady Cora para sa mga PWDs. (DEC, LGUTac-Info)