Open post

Organic Rice Agriculture Technology, tinalakay sa Brgy. Lancheta

Sa patuloy na pagsisikap ng Office for the Agricultural Services ng Lungsod ng Tacurong na hikayatin ang mga lokal na magsasaka na tangkilikin ang organikong pagtatanim ng palay, isang Field Day ang isinagawa sa Kalingaw Farm, Brgy. Lancheta, para talakayin ang Organic Rice Agriculture Technology, Enero 21, 2022.

Isa sa mga ipinakitang pamamaraan ng organikong pag-aalaga ng palay ay ang paggamit ng Black Liquid Smoke bilang natural na pesticide. Ito ay isang organikong likido mula sa katas ng damo at iba-ibang pananim na pinausukan para maglabas ng itim na dagta na siya namang gagamitin para ibinyag sa mga pananim.

Ayon kay Estaniel Segocio, may-ari ng Kalingaw Farm at isang Organic Farm Practitioner, ang pamamaraang ito ay natutunan niya mula sa Don Bosco Cooperative – isang kompanya na tumutulong sa kanila na palaguin ang organic farming.

Natalakay rin ang Vermicomposting Technology na isa ring organikong pamamaraan ng pagtatanim gamit ang dumi ng mga uod bilang pataba.

Pinangunahan ni Acting City Agriculturist Ivan Gerry G. Arazagon ang nasabing Field Day at pinangasiwaan din nito ang isang open forum para malayang makapagtanong o makapagpahayag ng saloobin at mungkahi ang mga magsasaka.

Bilang kahalili ni City Mayor Lino O. Montilla, dumalo rin sa pagtitipon sina City Councilors Carlos Borromeo P. Segura Jr. at Geronimo Arzagon para magbigay ng suporta.

Kasama rin bilang panauhin ang iilan sa mga Agricultural Technologist ng iba’t ibang barangay ng lungsod. ((DEC, Tac-Info)

Organic Black Rice ang pangunahing produkto ni Ginoong Segocio sa 1.6 ektaryang taniman nito sa Brgy. Lancheta.

Mayroon na ring Good Agriculture Practice (GAP) Certification ang Kalingaw Farm, patunay na sa organikong pagtatanim, dekalikad at ligtas sa kalusugan ang mga produkto ng nasabing taniman. (DEC, Info-LGU)

Vermicomposting Technology bilang organikong pataba sa lupa, ibinahagi sa mga magsasaka ng Tacurong

Gamit ang mga kumikislot-kislot na uod na may rasang African Night Crawlers, nais ng Office for the Agricultural Services na pausbungin sa Lungsod ng Tacurong ang Vermicomposting Technology – isang organikong pamamaraan ng pagpapanumbalik ng pinakamainam na kalagayan ng lupa, gamit ang dumi ng mga uod, upang mas maging produktibo ang pagtatanim dito.

Sa isang Field Day na pinangunahan ng Agri Office nitong Enero 12, 2021 sa Brgy. Kalandagan, ipinaliwanag ni Lino E. Insularin, Agriculturist I, sa mga magsasaka sa syudad ang pamamaraan ng Vermicomposting Technology.

Nailahad dito na gamit ang mga tira-tirang gulay at prutas, pati na rin mga dumi ng mga hayop pansaka, maaring mapakain at maparami ang mga African Night Crawlers na kalaunan ay maglalabas ng kanilang sariling dumi. Ang mga duming ito na hahalo sa lupa kung saan sila inaalagaan ay tinatawag na Vermicast – ang pangunahing produkto ng Vermicomposting Technology.

Ang Vermicast ay isang organikong pataba sa lupa at mga pananim. Maari itong pumalit sa mga sintetikong pataba na may kamahalan ang presyo.

Pinaunlakan ni City Mayor Lino O. Montilla ang nasabing Field Day kung saan ibinahagi niya ang kanyang suporta at magandang balita sa mga magsasaka. Hinikayat din ni Mayor Lino ang mga ito na pag-igtingin ang pagtanim ng mga de kalidad na gulay at prutas nang sa ganoon ay maialok ang mga ito sa mga namumuhunan at nang sa kalaunan ay maging supplier ang iba sa mga magsasaka dito sa Tacurong.
Bilang panimula, magbibigay ang Agri Office ng libreng paunang suplay ng mga uod sa mga magsasakang mayroon ng handang lupa para sa mga ito.

Kasama rin si Acting City Agriculturist Ivan Gerry Arzagon at ang mga kawani ng Agri Office sa isinagawang pagpupulong sa mga magsasaka. (DEC, LGU-TacInformation)

Scroll to top